Kultivimi i kanabisit nuk ka të sosur. Kështu në operacionin e koduar “Shkozeti”, në pranga ka përfunduar 25-vjeçari Elio Bedulla.
I riu ishte shpallur në kërkim pasi në datë 4 qershor 2018 dyshohet se ka qëlluar me armë zjarri në drejtim të shtetasit S.N.
Por gjatë kontrollit të ushtruar në banesën e shtetasit Y.T, dhënë me qera, në lagjen nr.14 në Shkozet, në 2 dhoma është konstatuar se ishin përshtatur për kultivimin e bimëve narkotike nëpërmjet llambave elektrike.
Po ashtu është konstatuar lidhje e paligjshme e energjisë elektrike në banesë, që shërbente për furnizimin me energji.
Në cilësinë e provave materiale grupi hetimor ka sekuestruar:
• 221 bimë të dyshuara të llojit kannabis
• një sasi e vogël kanabis;
• 1 armë zjarri pistolete.
Policia thotë se në kërkim është dhe 33-vjeçari R.G., i cili në bashkëpunim me 25-vjeçarin kishin nisur mbjelljen e kanabisit.
Gjithashtu është proceduar në gjendje të lirë për shpërdorim detyre shtetasi K.D., 28 vjeç, faturist, OSHEE Durrës, pasi nuk ka konstatuar lidhjen e paligjshme të energjisë elektrike në banesën e shtetasit Y.T.
